做苗圃義工，提昇生命力

做苗圃義工，提昇生命力

[本文寫於2001年10月]

最近政府高官經常勉勵港人要持續學習，提昇個人競爭能力，以適應香港經濟轉型。據我話，去參加僱員再培訓，不如苗圃做義工，因為做苗圃野有度好，就係由唔識做訓練到學識做，進而成為熟手技工，招招實用。而且近朱者赤，係苗圃大家庭薰陶下，愛心善心慈悲心、眼界思想境界，均大為擴闊，唔單止提昇競爭力，仲提昇生命力添。以我自己親身經歷，以前唔識電腦中文打字，但自從幫手做苗圃，迫住要打中文，學下學下，依家都打得兩手者。以前都唔識用電腦文書處理及試算表等軟件，又係學下學下，依家都識得用吶，真係助人自助，一D都無錯。

再以楊坤叔為例，以前都唔用電腦，但係佢自從加入國內服務部，成為最年青有為之地區幹事後，努力用電腦，加埋用電腦手寫板，正所謂士別三日，刮目相看，短短數日間，已使用至爐火純青階段，電子妙筆揮灑自如之下，洋洋數千言之講稿，都無難度，電腦專材都要寫個服字俾佢。

苗圃義工日間有正常工作，好多時互通音訊，電話都講唔到咁多，於是齊齊採用22世紀最新科技，即「伊妹兒」(e-mail) 也。得伊妹兒相助，一篇篇雄圖偉略大計、又或者一篇篇經世濟民之作、又或者一篇篇雋永溫馨小品，只需勞動滑鼠在螢幕上潚灑走一回，即時千里傳音，各收信義工安坐家中或辦公室，即時收到，無需信紙信封，連郵票錢都節省埋。收信人閱後有感而發，大可在電子信件上大書特書，有來有往，思想交流多，人都醒神D。有時一日間mail來 e去，不亦快哉。

日前為行路上廣州拉街頭橫額，看到一幅幅宣傳橫額在馬路旁豎起，想到許多經過的市民看到橫額後會報名參加，便十分有滿足感。張掛橫額時，身邊車輛飛馳而過，頗有我欲乘風歸去，又或有騰雲駕霧之感。有些繁忙馬路，欄杆在車輛之長年累月之熏淘下，由白鐵變成黑炭，比環保署所設之空氣監測站數據還來得實在，義工拉完橫額即變成黑手黨成員，亦難得之體驗也。

第三屆挑戰12小時，在10月28日順利舉行，講開報名人數，夠哂曲折離奇，扣人心弦。何解? 眾挑戰籌委早於7月始，已密鑼緊鼓，推出各項宣傳攻勢，出地鐵車廂廣告，街頭掛橫額，到8月份更四出到行山熱門地點廣發英雄帖(報名表也)，到9月頭，報名人數還不到400人，籌委正為此著急不已。幸好黃天不負有心人，之前努力播下的種籽，終於在9月10日第一次截止報名時一齊發芽，專程來會址報名的參加者，排隊排到落街，據講，當日收過千名人仕報名!之後，雖然報名費增加，依然有多數百人報名，至9月17日最後截止報名後統計，報名人仕達1800人! 曾經蒼海難為水，挑戰籌委主席辛建生今後都唔駛再去玩過山車吶。

各位讀者閱讀本文時，行路上廣州即將於12月15日截止報名。今屆廣州籌委雄心萬丈，目標招募500人參加，屆時三線齊發，一眾健兒向廣州天河進發，到終點時，想必另有一番熱鬧。每名參加者，需要以五日時間完成由香港至廣州約140公里的路程，同時向親朋戚友募捐5000元或以上之助學善款，參加者提昇體力之餘，還提昇善心，勸親友行善積福也，如參加者積極進取，更可發掘各種募捐及籌款方法，廣開善款之源，於大功告成之日，自信心肯定大大提高。也許從籌款體驗到事在人為，迪今後人生路上更奮發圖強呢。在此代行路上廣州籌委向讀者呼籲，各位想提昇生命力，就坐言起行，即刻報名參加行路上廣州啦。